இராமரும் கிருஷ்ணரும் இறைதூதர்கள் தான் - டாக்.ஜவாஹிருல்லாஹ்

ஏக இறைவனின் திருப்பெயரால்...

இராமரும் கிருஷ்ணரும் இறைதூதர்கள் தான் - டாக்.ஜவாஹிருல்லாஹ்

புதிய அரசியல் மோகத்தில் திளைத்திருக்கும் ஜவாஹிருல்லாஹ், பதவியை அடைவதற்காக இந்துக்களின் ஓட்டை பெறும் நோக்கத்தில் இஸ்லாமும் இந்துமதமும் ஒன்று என்ற ரீதியில் தற்போது தன்னுடைய வியூகத்தை அமைத்துக்கொண்டு வருகிறார். இந்துமதத்தின் அவதாரபுருஷர்கள் அதாவது, கடவுளின் அவதாரங்கள்தான் இஸ்லாத்தின் இறைத்தூதர்கள் என்று பகிரங்கமாக கூறுகிறார். ராமர், கிருஷ்ணர் போன்றோரைத்தான் இந்து மக்கள் அவர்களின் அவதாரபுருஷர்கள் என்று நம்புகிறார்கள்.இவர்கள் இறைதூதர்கள் என்று ஜவாஹிருல்லாஹ் எந்த அடிப்படையில் கூறுகிறார்?

''இஸ்லாம் கூறும் இறைதூதரின் நோக்கமும் இந்து மதம் கூறும் இறை அவதாரத்தின் நோக்கமும் ஒன்றாக இருப்பதிலிருந்து இறை தூதர்களைத்தான் இந்துக்கள் இறை அவதாரங்கள் என்கிறார்கள் என்று விளங்கி கொள்ள முடிகிறது''. என்று தமிழன் எக்ஸ்பிரஸ் இதழில் கேள்வி திருவிழா பகுதியில் கும்பகோணத்தை சேர்ந்த சம்பந்தம் என்ற இந்து சகோதரர் கேட்ட கேள்விக்கு ஜவாஹிருல்லாஹ் பதிலளிக்கும் போது கூறுகிறார்.

பூமியில் எப்பொழுதெல்லாம் அக்கிரமம் தழைத்தோங்குகிறதோ அப்பொழுதெல்லாம் கடவுள் மனித வடிவில் அவதாரமெடுப்பார் என்பதுதான் இந்துக்களின் நம்பிக்கை. அப்படித்தான் கடவுள் ராமராக வந்தார் என்றும் கிருஷ்ணராக வந்தார் என்றும் அவர்கள் நம்புகின்றனர்.

இந்த நம்பிக்கைதான் இஸ்லாமிய நம்பிக்கையா?

ஜவாஹிருல்லாஹ்வின் நம்பிக்கையும் இதுதானா?

வெண்ணெய் திருடியதாகவும் குமரி பெண்களுடன் கொஞ்சி குலாவியதாகவும் இந்துக்கள் நம்பும் கோகுலத்து கிருஷ்ணனை இஸ்லாமிய இறைதூதராக சொல்லும் துணிச்சல் ஜவாஹிருல்லாஹ்வுக்கு எப்படி வந்தது?.

மலையை பெயர்த்து ஒரு கையில் தூக்கிக்கொண்டு பறக்கும், வாலுள்ள வானரப்படைகளை துணையாக கொண்டு பல லட்சம் ஆண்டுகளுக்கு முன்பு வாழ்ந்ததாக கூறப்படும் கற்பனை கதாநாயகன் ராமரை இறைதூதர் என்று இவர் எந்த அடிப்படையில் கூறுகிறார்?.

மனிதன் தனக்கு தோன்றுவதையெல்லாம் கூறுவது இஸ்லாம் ஆகாது குர்ஆனில் கூறப்பட்டவையும் நபிகளார்(ஸல்) அவர்களின் நடைமுறை மட்டுமே இஸ்லாமாகும். நபிகளாரின் செவிலிதாயை தலித் சமுதாய பெண் என்று ஹைதர் அலி கூறியதாக தங்கம் என்ற பத்திரிகை வெளியிட்ட செய்தியை பார்த்து முஸ்லிம் சமுதாயம் கொதித்து போயிருக்கும் நிலையில் எரியும் நெருப்பில் எண்ணையை ஊற்றுவதுபோல் மார்க்க அறிவற்ற ஜவாஹிருல்லாஹ்வின் பேட்டி அமைந்துள்ளது.

ஓட்டு பொறுக்குவதற்காக இஸ்லாத்தின்மீது களங்கம் கற்பிக்கும் ஜவாஹிருல்லாஹ், அல்லாஹ்விடம் தவ்பா செய்து சமுதாயத்திடம் பகிரங்க மன்னிப்பு கேட்கவேண்டும். இல்லையேல் இந்துக்களை குளிர்விக்க நினைக்கும் ஜவாஹிருல்லாஹ்வை முஸ்லிம்கள் கை கழுவ போவது உறுதி.

குறிப்பு: நான் கொடுத்த பதிலை தமிழன் எக்ஸ்பிரஸ் நிருபர் மாற்றி எழுதிவிட்டார் என்று வழக்கம்போல அந்தர்பல்டி அடிப்பாரேயானால் இந்த செய்தியை தங்களுடைய அதிகாரபூர்வ இணையதளத்தில் பெருமையுடன் வெளியிட்டது எப்படி?.

அல்லாஹ்வின் பாதையைக் கேலியாகக் கருதி அதை விட்டும் மக்களை அறிவின்றி வழி கெடுப்பதற்காக வீணான செய்திகளை விலைக்கு வாங்குவோர் மனிதர்களில் உள்ளனர். அவர்களுக்கே இழிவு படுத்தும் வேதனை உள்ளது. (31 :6)